کابل- دولسمشرۍ ماڼۍ:ـ

دافغانستان داسلامي جمهوریت، ولسمشر حامد کرزي دهغو شپږو کاناډایي عسکرو په مړینه چې پرون دکندهار ښار په جنوب کې دافغانستان دخلکو ددښمنانو دیوې بمي چاودنې په ترڅ کې یې خپل ژوند له لاسه ورکړ، خپله خواشیني څرګنده کړه. ـ

ولسمشر کرزي دناټو ځواکونو په کاروان باندې دغه بمي برید په کلکه وغانده او دهغه عاملین یې دافغانستان دخلکو دښمنان وبلل، وې ویل: دهغو کسانو وژل چې دافغانستان دخلکو دسر اومال دامنیت دساتنې او له ترهګرۍڅخه دبشریت دخلاصون لپاره په سترو انساني خدمتونو بوخت دي، له بشر سره له دښمنۍ پرته بل څه نه دي. ـ

ولسمشر وویل: که دافغانستان دخلکو دښمنان دسولې او پرمختګ په وړاندې هرڅومره خپلو ناوړو عملونو ته دوام ورکړي، دافغانستان دآبادۍ په لاره کې به دافغانانو دټینګ هوډ په وړاندې هیڅکله دخنډ کیدلو توان ونه لري. ـ

دهېواد ولسمشر، دافغانستان دخلکو په استازیتوب دخپلې خواخوږۍ او ډاډ ګیرنې مراتب دکاناډا خلکو اوددغه تروریسي برید دقربانیانو کورنیو ته وړاندې کوي.ـ